Recent Comment

Archives

Funky Forest: the First Contact (無厘頭森林の第一次接觸) [2005]

Funky Forest: the First Contact (無厘頭森林の第一次接觸) [2005]

導演
石井克人, 三木俊一郎, Aniki
演員
寺島進, 淺野忠信, 池脇千鶴, 吹石一惠, 美野真千子, 加瀨亮, 西門 Erika, 庵野秀明
連結
imdb link
www.nice-movie.com 
japan yahoo movie site 

 

 

簡介
無女溝結他三兄弟十足騎呢, 當教師的大佬勝一積極籌辦單身野餐會, 長髮二佬 Masaru 日夜苦練結他冧女, 三佬則是個終日吃個不停的外籍肥仔~ 勝一在溫泉旅館巧遇健康食品社長 Ichigo, 她正跟兩位好姊妹前來渡假, 三位女孩互訴匪夷所思的故事~ 英語教師 Takefumi 跟畢業生 Notti 似友非友, 二人呆在家中聽歌打碟, 細數千奇百怪的夢境~ 校園內, 一位靚靚學生妹被捉來拯救外星人, 學生們拿著各種嘔心樂器奏樂, 羽毛球女生則在體育館決戰吸血蟲~ 來到 homeroom 時間, 學生逐一分享個人經歷, 聽學級委員長示範如何打招呼~ 單身野餐會當日, 只有一班寡佬出席, 卻發現男士們為覓佳偶各自下過不少苦功~ ナイスの森 (nice 森林) 21個片段絕對瘋狂兼無厘頭, 敬請諸君勿用常理推敲解釋~

 

評語
日本怪片特別多, 但古怪程度能跟這部 “Funky Forest: the First Contact” 匹敵的實在沒有多少~ 面對這樣荒誕離奇的電影, 真不知應該從何說起, “邏輯” 在這裡幾乎不存在, 種種荒誕至極的情節保證嚇你一跳~ 電影像是一連串短片大串燒, 每段開始時均加會上字幕標題, 間中又像日本電視廣告般在畫面一角顯示 logo~ 但各個故事的人物又有一定關聯性, 故事之間甚至有前因後果可以追尋~

電影像黑膠唱片般分成 A side 和 B side 兩部分, 全長達兩個半小時, 中間還認真地加插了令觀眾不知所措的3分鐘休憩時間~ 在 A side 一幕, 英語教師 Takefumi (加瀨亮 飾) 在家中翻弄黑膠唱片打碟, 充當 DJ 把兩首歌曲自然地 mix 在一起~ 事實上, 這電影就像一回超長的 DJ session, 三位怪雞導演 (兼編劇) 運用影像大玩 mixing, 把幾個看似風馬牛不相及的人物和情節接駁重疊, 連結為一, 轉出一部刻意斷裂, 刻意荒謬的古怪電影~

談到斷裂, “Funky Forest: the First Contact” 在主流影壇實在難逢敵手~ 片中各個故事大都無頭無尾, 不是出現 “終” 字也不知已完結~ 導演們運用了極多的跳接, 營造不和諧的感覺, 那些打出 “ナイスの森” logo 的 (廣告?) 片段甚至只得幾秒… 這些處理手法合力把電影的突兀感推向不可理喻的極端~

原來不止人物和故事情節可以玩 mixing, 就連電影類型也可以~ 片中揉合了多種類型片的元素, 計有日式荒誕娛樂節目, 廣告片, 家庭倫理劇, 歌舞片, 愛情片, sexploitation, 動畫, 漫畫, 核突科幻片, 特攝片, 青春校園劇等等, 加起來變成一隻四不像的怪物, 但這相信也正是導演們預期中的效果~

真不明白三位導演怎能想出如此光怪陸離的劇本, 好像勝一 (寺島進 飾) 練習舞蹈, 外星人找學生妹配種, 羽毛球女生苦練球技幾幕, 情節完全意想不到~ 另外學級委員長教同學們打招呼一幕, 則像是 “麥兜菠蘿油王子” (McDull, Prince de la Bun) [2004] 中麥兜 “詐詐帝學兩文三語” 的真人日文翻版~ 更奇怪的是, 在homeroom 學生叢中竟然找到動畫大師庵野秀明 (動畫版 “Neon Genesis Evangelion” (新世紀福音戰士) [1995] 的製作者), 而他在片中亦正飾演一位動畫家~

合力編導此片的石井克人, 三木俊一郎, Aniki 三人, 原來都在武藏野美術大學的 visual communication design 學科畢業~ 其中三木俊一郎和 Aniki 都是廣告片導演, 只有石井克人拍過 “Shark Skin Man and Peach Hip Girl” (鯊皮男和蜜桃女) [1998] 和 “Party 7″ [2000] 等改編自漫畫的電影~ 查實石井克人上一部作品 “the Taste of Tea” (茶之味) [2004] 大大收歛了斑斕浮誇的風格, 甚得各界好評, 想不到他沒多久便 “故態復萌”, 還 “變本加厲” 得這樣可愛~

“Funky Forest: the First Contact” 是一部看過才知過癮的電影, 即使再多理性分析也難以交代它的精奇之處~ 正如參加 DJ party 一樣, 不用多加深究理論和技巧, 只需全情投入其中享受娛樂便是~

[ 7.5 ]

 

8 comments to Funky Forest: the First Contact (無厘頭森林の第一次接觸) [2005]

  • 你能為如此雜亂無章的電影寫出如此有條理的介紹,佩服,而且資料很有用。

    非常同意你最後一段所說。

  • 謝~
    若果認為電影必須要有具邏輯劇情的人, 肯定會說這電影是大爛片, 但這電影最過癮獨特之處, 正是它如何堅持拒絕被理性分析~ 要拍一部完全無邏輯的怪片, 也許不比拍一部合情合理的電影容易?

  • >>日本怪片特別多, 但古怪程度能跟這部 “Funky Forest: the First Contact” 匹敵的實在沒有多少…

    其實不然…前幾年有套vermillion pleasure night都幾癲下, 另外印象中都睇過一兩套癲片, 但醒唔起係咩名

    呢套戲睇得人好開心,其實就係想觀眾不用太深究吧,另外係音樂,有少少被佢啟發我想聽多d dj音樂呢, the volumn果段好好聽.

  • “vermillion pleasure night” 就係 “週末任你癲”, right?? 呢套我都有睇過, 但係完全無奈, 好無趣, 好想走, 但最終都堅持到尾~ 不過呢套 (無記錯的話) 係80年代的電視節目remake, 可能因為年代問題所以d gag笑唔出, 亦唔覺特別subversive, 難保 “無厘頭森林” 10年後翻睇都係同樣命運~

    我另一個比較喜歡 “無厘頭森林” 的原因, 係因為佢故事之間有少許關連, 同埋係好似dj mixing咁將好多唔同元素同人物同情劇連埋一齊, 或者可以稱之為 “無邏輯之中o既邏輯”?

    dj音樂… make sure你唔好買錯d mk n合一炸機碟啊 :P

  • 请问,你这套电影是在哪里看的?
    我很想看这部电影啊,香港的电影院应该还没有上影吧?

  • 香港的summer pops 電影節~ 這電影已出了dvd版, 耐心等一下吧 :)

  • 週末任你癲

    係呀,我連中文名都唔記得,我睇時都有難受,因為似睇緊歡樂今宵咁囉,但其中有幾parts都唔錯的,fuccon family就幾好.

    另外我都睇左eli eli,無可避免將兩套戲一齊感受,覺得音樂在其中都佔左好重要既位置,不過前者黎講音樂係比較有深刻意義,後者就係一種電影既脈絡,有d場位甚至令我覺得係有左音樂然後先編情節的,而導演好可能就係想將音樂帶畀觀眾而已…

    dj音樂…我諗我聽左好幾年音樂,唔會買錯mk類remix喇…..-_-”’
    不過你又有無好介紹呢?我自己聽得最類似既會係royksopp,boardcast,looper…可能都係差好遠…

  • 對, 就好似睇許冠文同阿叻搞gag一樣, 雖然間中偶有佳作, 但係絕大多數都好 “上個年代”, 笑唔出~ 講起日本怪雞o野, 之前讀到一篇關於70年代一個日本電視兒童節目的介紹, 個節目叫 “クレクレタコラ”, 有d似 “天線得得b” 的, 依家睇d screen cap返而似cult片~ :P

    我以為你所指o既DJ 音樂係d clubbing music, 即係paul oakenfold, paul van dyk 一類dj打碟的 mix?

    講起mk dj mix, 之前去親一間網吧都會不斷播呢類將twins, boyz, 劉浩龍同stephy加速炒埋一碟o既音樂, 好惡頂…

Leave a Reply

  

  

  

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>